General Santos City- Dako ang pagtuo sa pamilyang Cabaniero nga tungod sa depresyon human gibulagan sa asawa, maoy rason nga nagpakamatay ang 29 anyos nga bana nga nailing si Alfie Cabaniero, taga Litan Barangay Sinawal ning dakbayan.
Nasayran nga nasudlan na lamang sa comfort room si Cabaniero nga nagbitay na, gamit ang pisi sa manok. Daling gidala sa Mindanao Medical Center si Alfie Cabaniero apan gideklara na kining dead on arrival.
Sumala sa igsuon niining si Albert ayha naghikog ang iyahang igsuon, nag-text pa kini sa ilahang igsuong babaye sa Mlang North Cotabato, nga sumala pa dili pasagdahan ang iyahang mga anak ug nangayug pasaylo sa iyahang himuon.
Giplastar na usab niini daan ang iyahang duha ka mga bata sa iyahang igsuong lalaki apil ang mga birth certificate ug nagtugon nga pahumanon gyud ug eskwela. Aminado si Albert nga problemado iyahang igsuon human kining nagbulag sa asawa nga sumala pa sa ilahang version niuban kini sa laing lalaki.
