BACOLOD CITY – Duha ka mga persona ang nabiktima sang “hurikap” girls sa separado nga insidente nga natabo sini gid lamang nga kaagahon sa downtown area sang ciudad sang Bacolod.
Una nga biktima isa ka 35-anyos nga lalaki, kasado kag pumuluyo sang Purok Bayanihan, Brgy. Taculing, Bacolod City.
Suno biktima, may mga las 3 kaina sang kaagahon ini siya ang sakay sa iya motor kag sa paglab-ot malapit sa isa ka pension house sa dalan Bonifacio sa area sang downtown sa Bacolod, may nagpalapit sa iya nga isa ka grupo sang mga kababaenhan.
Nakibot ini siya ginpamangkot kon bala luyag niya mag “short time” kadungan sa paghurikap.
Sang nagpamalibad ang biktima, naglakat naman lang ang grupo sang mga babayi apang iya nadiskubrehan nga wala na ang iya wallet nga nasulod sa tuo nga bulsa sang iya pantalon kay may unod nga P8,000 pesos.
Ang ikaduha naman nga insidente natabo pasado las 4 sini nga kaagahon sa dalan Cuadra-Gatuslao.
Biktima naman diri ang isa ka 29 anyos nga lalaki, kasado kag pumuluyo sang Brgy. Mandalagan.
Suno sa biktima nga samtang ini siya nagalakat sa amo nga kalye, ginpalapitan siya sang is aka babayi kag ginpamangkot man kon gusto niya mag short time sabay hurikap.
Nagpamalibad ang biktima kag sa paghalin na sang babayi, didto kag iya natukiban nga wala na ang iya cellphone nga nagabalor sang kapin P7,000 pesos.
Lunsay nagdagon-dagon sa Police Station 1 ang mga biktima agud magpa-blotter./dyHB BACOLOD
