Mga natural ug epektibo nga paagi sa pagtangtang sa makeup
USO na niining panahona ang nagkalain-laing klase sa makeup sa mga babaye ug ingon man sa mga babaye og kasingkasing. Human sa taas nga adlaw, kinahanglan og makeup remover para dili madaot ang nawong. Sa pagmahal karon sa tanang mga palitonon, gasto usab ang pagpalit og makeup remover. Apan adunay mga butang nga anaa ra sa inyong balay nga makatabang kaninyo pagkuha sa makeup ug mas luwas pa.
01. Honey ug baking soda – usa sa mga natural nga makeup remover. Magbutang ka lang og gamay nga honey sa usa ka basa nga panapton ug magsabwag og baking soda, voila!
02. Olive oil – (para sa mga sensitibo ug uga nga panit) aduna kini’y daghan ug nagkalain-laing kaayuhan. Aduna po’y alternatibo sa olive oil, kini ang mga natural oil sama sa castor ug jojoba oil.
03. Baby oil – kon kamo walay olive oil sa balay, suwayi ang baby oil sa pagtangtang sa inyong mga makeup ilabi na sa mascara. Paghuwad lamang og baby oil sa usa ka gapas ug ipahid sa inyong nawong. Paggamit usab ug basa nga panapton para sa pagkuha sa mga “oil residues” nga nahibilin sa nawong.
04. Gatas – kini ang pinakamaayo nga mokuha og makeup ilabi na sa mata nga bahin. Pagbutang lamang og gatas sa gapas ug hinayhinay nga ipahid kini sa mata nga dapit nga adunay makeup. Pagkahuman, hugasi kini og tubig.
05. Baby lotion – kini ang labing sayon motangtang sa makeup. Pareho sila og proseso sa gatas. Pagbutang lamang og baby lotion sa gapas ug dayon ipahid sa nawong.
06. Baby wipes – naila kini tungod sa pagkaligdong niini ug di ka mabalaka nga maguba ang imong panit sa paggamit niini. Ang baby wipes usa sa mga sayon ug di kampat nga paagi sa pagtangtang sa makeup.
Source: www.sunstar.com.ph
Genevieve A. Quibedo, CNU Comm Intern
