BACOLOD CITY – Ginbitbit sang mga barangay officials sang Brgy. Banago kaina sang aga ang ila resolusyon nga nagahingyo sa Bacolod City Police Office paagi kay PSupt. Francisco Ebreo nga i-seal off ang Sitio Sibucao sa imo nga barangay kon diin nahamtang ang puluy-an sang wanted drug personality nga si Ramy Poja.
Ini sa atubang sang pag-ako ni Punong Barangay Arnel Benjamin nga pila sa mga tupad balay kag himata ni Poja ang naga-protihir sa iya, apang may mga residente man sa Sibucao nga luyag na nga madakpan si Poja.
Suno kay Benjamin nga indi lipud sa iya ihibalo ang aktibidad sang illegal nga druga sa iya barangay particular sa Sibucao gani daku ang pagpati sang mga pumuluyo diri nga kon madakpan na si Poja, ma-untat na ang problema sang illegal drugs sa ila lugar.
Si Ramy Poja ang ginakabig sang pulis nga madanlog dakpon kasunod nga makapila ka beses na ini nga nakapalagyo sa mga ginpatigayon nga drug operations sang utoridad sa iya balay sa Sitio Sibucao.
Madumduman nga una gindakup si Ramy sadtong Augustu 19, 2015 apang ini siya ang nakapalagyo.
Ginsundan ang operasyon sadtong Hulyo 19, 2016 apang liwat nga nakapalagyo ang suspek kag sini nga tuig 2018 ginpatigayon ang operasyon sang Pebrero 24 apang liwat nga nakapalagyo si Ramy Poja./In photo: Ang kwitis nga ginapalupok sang mga residente kon mag-abot ang police operatives sa Sibucao
