Temporaryong ipasirado ang tanan mga sementeryo sugod Oktubre 29, 2020 hangtod Nobyembre 4, 2020 subay sa kamandoan sa nasyonal nga gobyerno pinaagi sa IATF Resolution No. 72.
Sa interview sa RMN Malaybalay ngadto kang Nene Belisario, ang spokesperson sa IAFT-Malaybalay gibutyag niini nga niadtong Setyembre 21 ning tuiga pa nagpagawas na ang siyudad ug executive order number 104 nga naghibalo sa publiko nga temporaryong isira ang tanang pribado ug pampublikong sementeryo sa siyudad.
Kini gipatuman sa tibuok nasud aron malikayan ang pagdagsa sa tawo sa maong lugar ug aron mapugngan ang pagkuyanap sa makamatay nga sakit nga covid-19.
Apan mamahimong mobisita sa sementeryo sa wala pa ang Oktubre 29 ug paghuman sa Nobyembre 4 apan adunay pagasundon nga mga sumbanan sa minimum health standard kontra covid-19 sama sa: 30% lamang ang gidaghanon sa ihap sa tawo ang gitugotan nga makabisita, pag-suot og face mask ug face shield ug kanunay nga pag-obserbar sa Social distancing.
Hinoon giklaro ni Belisario nga tugutan gihapon kung adunay ilubong apan kinahanglan nga masunod ang mga protocols ilabina sa ihap sa mga mutambong.
