Davao City – Gikinahanglan nga magdaginot niining panahon sa krisis sa coronavirus aron nga maka survive niining kalisud sa atong kahimtang ubos sa community quarantine.
Sumala ni Atty. Maceste Uy, presidente sa Integrated Bar of the Philippines, Davao City chapter nga usa sa pamaagi aron nga makasugakod sa kapit-os karong panahona mao ang dili magpataka ug gasto ingun man daginoton ang bisan unsa mang hinabang ma pinansyal man o food ration nga giayuda sa kagamhanan.
Matud ni Atty. Uy nga ang realidad pobre ang atong nasod rason nga dili maapod tanan sa hinabang busa kun kinsa man kadtong nahatagan og ayuda angay nga planuhon ang pag gasto ug i-prayoridad ang mga batakang panginahanglan sa pamilya.
“Ayaw mo og gasto nga katong dili gyud gikinahanglan. Unsa tong mga basic needs gyud bugas sud-an. Siempre kung igo-igo ra ang gihatag sa gobyerno dili gyud ta mo order anang gi deliver pa. Adto gyud tag palengke kay didto man ta makabarato so kunbaga atong inaton gyud na siya. Kung kita tong beneficiary maningkamot pud ta nga mainat gyud tong gihatag sa gobyerno. Di pud ta magpatakag gasto naay uban diha ang kwarta gipa parlor ang uban gisugal which is mali di ba” segun ni Atty Uy.
Gidugang ni y Uy bisan ug ipaubos na sa lokal nga kagamhanan sa general community quarantine ang syudad sa Davao angay sa gihapon nga mutamod ang publiko sa mga talamdan aron nga dili musamot kadaghan ang matakdan sa COVID-19.
RadyoMaN Erin Lumosbog
