iFM Comfort Room,
Maayong adlaw sa tanan. Salamat DJ Maikee Gol sa paghatag ug higayon sa akong sugilanon nga mapaminawan sa kahanginan. Ako diay si Jaylord. 27 years old.
Akong girlfriend, nagtrabaho nana sa US isip usa ka nurse. 5 years nami. LDR (long distance relationship) mi since last 2015 pa. Kauban pod niya ang akong duha ka mga anti, silbi mga igsuon sa akong mama.
Hagbay ra sad nga nakapangandam ko sa akong paglarga. Unta larga na gani ko sa niaging tuig pa kung desidido lang jud ko. Gauban na unta mi sa akong uyab karun. Apan nahimo nakong problema ang akong mama.
Sa tinooray, ako ra ang nag-inusarang anak ni mama. Wala miy kaliwat kaayo diri sa Cebu, kay taga Negros man jud mi apan ngari nako nagdako. Single parent si mama, sukad nga nakamatngon kog buot, wala na jud nako mailhi pa ang akong amahan. Wala ra man na nako kay ang importante, naa akong mama ug gipangga ko pag-au. Mao bitaw na nga ana sila, mama’s boy jud ko.
Ang akong problema, gidudahan man nuon ko sa akong uyab. Nakaingon siyag basin kuno nga wala nako mahigugma niya kay nganung giturn down pa nako ang opportunity nga niabot sa niaging tuig. Atu man gud nga higayon iFM Comfort Room, nasakit si mama ug naospital. Ngadto nga panghitabo, wala juy laing nakabantay ni mama, ako ra jud. Timing sad kaayo nga gikan ko niresign na sa akong previous nga gitrabahuan. Sa dihang wala kaayo miy matawag arun mubantay ni mama, nagpasalamat ko nga available ko ba. Maong nakahunahuna ko kung mularga ko, mag-inusara nalang akong mama diri. Naa tuod siyay trabaho apan lahi ra man gud nang naa sad ko sa iyang kiliran.
Si mama, okay ra man jud niya nga mularga ko. Pero sa akong kaugalingon, makonsensya jud ko. Gipangga jud nako si Mama. Di bitaw nako maantos nga mubiya ko. Ako naman nga giingnan akong uyab ana apan lisud kaayo siyang pasabton. Kahibaw ko nga gimingaw na sad siya nako. Mao bitaw nga napiit kaayo ko aning sitwasyuna.
Ang akong uyab, niduol na gud na sa akong Anti usa didto sa gawas kay para lage daw mapugos ko nga mularga na. Sa pagkakarun, nanarbaho ko isip usa ka Nurse sa usa pod sa mga hospital diri sa syudad kay anugon pod akong oras kung wala koy trabaho.
Lisora bitaw idesisyon DJ Maikee Gol. Di ko kabiya ni mama pero dili sad ko ganahan nga maglalis mi sa akong uyab tungod ana. Dili siya kasabot unya kusog na ra ba kaayong mangloud. Nahadlok pod ko. Love nako siya, pero makasabot ra man siguro mu sa akong rason pod.
Palihug tambagi ko. Mularga nalang ba kaha ko bahalag mag-inusara si mama diri sa amu ? Or mupabilin ko bahalag masuko akong uyab. Kuyawan ko nga basin ug makigbuwag na hinoon siya.
Salamat iFM Comfort Room sa pagbasa sa akong sugilanon.
Yours Truly,
Jaylord
*** Gusto ba kang makadungog sa mga tambag para sa atung letter sender ? Paminaw lang sa programang iFM Comfort Room kauban inyong DJ Maikee Gol (FB: Maikee Gol Ifmcebu) matag 1-3PM (Mondays-Saturdays). Please also visit our official Facebook Fanpage www.facebook.com/ifmcebuofficial/
Para sa mga gustong mamahimong letter sender , share your stories sa ifmcomfortroom@gmail.com
Daghang salamat. Sa sunod na pod nga sugilanon, idol !
