iFM Comfort Room,
Good afternoon sa tanan. Chevz akong pangalan. Buotan nga pagkalalaki, matinahuron sa ginikanan ug naay respeto sa mga babay. Sa tinood lang, naa jud koy pagkatorpe sauna pa. Ambot ug naa ba niy kalabutan sa akong pagka mama’s boy nganung mauwawon kaayo ko. Pero dili sa pagpanghambug, bright ko sa klase. In fact, nigraduate ko with flying colors. Cum Laude ko last year lang.
Muuban man nuon ko ug tagay-tagay sa akong barkada sa college pero dili kaayo ko muinom. Kusog ra ko mugitara para sa grupo. Sa dihang nagbirthday ang amung usa ka blockmate sa college, giinvite mi sa akong barkada. Human ngadto sa ilaha, nangadto mi ug usa ka bar kay didto daw sila magtiwas. Ngadto, medyo nabag-uhan ko kay dili jud normal para nako ang magbar apan ang mas nakadani jud nako nga mupabilin ug dugaydugay sa bar kay tungod aning babay nga gibitbit sa amung kauban. Iya daw nga silingan si Aby. Gwapa, taas ug puti. Wala gud dayon ko makatingog pagpailaila pero akong mga barkada gitupo2 naming duha atung gabhiona.
Ang nakapait lang DJ, imbis nga mahatud nako si Aby atung higayuna, ako man hinuon ang giyayungan sa akong mga barkada kay pwerte naman nakong hubuga. Dili man ko anad nga muinom apan nagpatuyang ko kay naa si Aby.
Nauwaw gud ko kung mumessage ba ko ni Aby kay kita man ko sa facebook ngiya, nakatag sa usa sa mga pictures namu. Sa dihang gi-add ko niya, pwerte nakong lipaya kay gisundan man gud nig chat niya. Ngadto nagsugod ang tanan ug wala na nako sayangi pa. Nanguyab ko niya wa madugay ug nagkakami.
Lipay pa gani kaayo ang akong mama sa dihang napailaila na nako si Aby niya. Si Aby pod pwerteng lipaya. Gihatag niya tanan diri nako. Tanang first time akong nasuwayan niya. Apan ang problema, wala jud mausab si Aby sa iyang pagkabisyoso. Hilig siyag tagay sauna pa, usahay dugay muuli kay gikan niuban sa iyang mga amiga. Mag 1 year pa man mi ni Aby DJ, bawalan ba nako siya ? Dili naman gud ni makaayo niya ug dili sad ko ganahan magpabilin siyang ingon ani. Naa tuy kausa nga ako siyag gibadlung, gilahi man niyag sabot. Dili man gani kuno makabadlong iyang ginikanan sa iyaha, ako na ba nga uyab ra. Uyab ra ? Mura man gani ko ug dili uyab kay wala man lang siya maminaw nako. Nasobraan na ka-palahubog. Nahiubos ko niya DJ. Wala gud siya mutext, wala siya magparamdam the whole night atu. Pasagdan na lang ba nako siya sa iyang bisyo ? Unsa may akong mabuhat para mausab siya?
Tambagi ko.
Chevz
***
Gusto ba kang makadungog sa mga tambag para sa atung letter sender ? Paminaw lang sa programang iFM Comfort Room kauban inyong DJ Maikee Gol (FB: Maikee Gol Ifmcebu) matag 1-3PM (Mondays-Saturdays). Please also visit our official Facebook Fanpage www.facebook.com/ifmcebuofficial/
Para sa mga gustong mamahimong letter sender , share your stories sa ifmcomfortroom@gmail.com
Daghang salamat. Sa sunod na pod nga sugilanon, idol !
