iFM Comfort Room,
Maayong hapon sa tanan. Ako diay si Vanny. 37 anyos. Ang akong anak kay mag 6 years old na karung buwan sa December.
Sa niaging tuig sa 2014, gibiyaan nako sa akong bana. Nahimo ko nga biyuda sa dihang nipanaw siya. Atung hitabua, gareklamo na akong bana nga murag bug-at iyang lawas ug kapoy kaayo ilihok maong nag-absent siya. Ako pod trabaho man ko sauna sa Carbon. Wala ra tu namu panumbalinga, gipatumar ra sad nako siya ug tambal sa iyang hilanat. Apan usa ka gabii ana, gitakigan akong bana pero dili naman simple nga takig maong gilahos nako siya sa ospital. Na-emergency siya ug wla dangti ug usa ka adlaw, gideklarar na nga patay akong bana. Case kuno tu sa leptospirosis ug nisaka na daw ang kagaw sa ulo.
Kalit kaayo ang mga panghitabo iFM Comfort Room. Kalit lang gikuha sa Ginoo akong bana. Maong ako nalang jud intawn nga giampo ang kahimlayan sa iyang kalag. Mura jud ug akong gipas-an ang tanang problema sa kalibutan. Gibasul pa ko sa pamilya sa akong bana tungod sa iyang kamatayon. Nagpabaya lang daw ko. Wala nalang ko mutubay pa sa mga isturya DJ kay ako ra ang madaot. Gasakit na gani ko sa kamatayon sa akong bana, ingon ana pa ang ilang pagtratar nako.
Karun mao ni ang problema iFM Comfort Room. Gipiton man ko sa mga igsoon ug ginikanan sa akong bana. Kahibaw man ko nga makapalta ko ug bayad sa kuryente ug tubig pero usa ra gud na kabuwan pero siguradoon nako nga mubayad man jud ko. Lamion naman gud nila ang isturya sa mga silingan nga mga tagpila daw ko kabuwan usa mubayad. Giagwanta ra gyud nako ang tanang mga isturya nila kay sa ngalan nga pamilya sa akong bana ug namuyo ra mi sa ilaha kauban ang akong anak. Ako pa jud ang nahimong bati sa ilang panan-aw sa dihang nireklamo ko nga ilang sugu-sugoon akong anak. Imbis nga muapas nako sa Carbon akong anak, ngadto man paapongon sa iyang anti. Kani jud nga maguwang sa akong bana maoy wala gyud nako mauyuni kay maoy kusog magbutangbutang ug isturya. Ang tarung ra gyud nako nga makaisturya sa ilaha, ang kinamanghuran ra gyud nila nga propesyunal. Nagtudlo sa usa sa mga eskwelahan diri, si Aida.
iFM Comfort Room, papahawaon naman hinoon mi nila sa amung gipuy-an. Si Aida ra jud ang nibabag. Ambot ug unsay kasabotan nila kay basta kahibaw ko nga ang akong bana, sa dihang nagtrabaho pana siya sa usa ka showroom sa mga sakyanan, nihatag na siyag dakong kantidad sa iyang mama para makapuyo lage mi kilid sa ilaha. Si Aida, kahibaw ana nga isturya maong wala siya makauyon sa desisyon sa iyang igsuon ug inahan.
Giinitan naman ko nila pag-ayo diri iFM Comfort Room, maong kahawaon na kaayo ko. Giingnan ko ni Aida nga mulaban lage jud daw siya nako. Muhawa nalang kaha ko DJ kay nagkagubot naman silang manag-igsoon tungod lang namu sa akong anak gud. Apan wala pa man jud koy kwarta sa pagkakarun samot nga pwerte nakong lugia sa Carbon. Kung napa tu akong bana karun, dili jud mi bastabasta lang madaug-daug DJ ay. Unsa may akong buhaton ?
Ang nagpadala,
Vanny
***
Gusto ba kang makadungog sa mga tambag para sa atung letter sender ? Paminaw lang sa programang iFM Comfort Room kauban inyong DJ Maikee Gol (FB: Maikee Gol Ifmcebu) matag 1-3PM (Mondays-Saturdays). Please also visit our official Facebook Fanpage www.facebook.com/ifmcebuofficial/
Para sa mga gustong mamahimong letter sender , share your stories sa ifmcomfortroom@gmail.com
Daghang salamat. Sa sunod na pod nga sugilanon, idol !
