Davao City – Tentative pa ang pagbukas sa turismo ug negosyo sa Island Garden City of Samal (IGACOS) karong Hulyo 1, 2020 tungod sa kabalaka nga basin ug mosaka ang kaso sa coronavirus disease (COVID-19) sa isla.
Sa interview sa DXDC RMN Davao kang IGACOS Mayor Al David Uy, giingon niini nga magpahigayon pa sila ug meeting sa tanang mga Beach Resorts Owner kabahin sa subling pagbukas sa mga establisemento partikular ang mga Beach Resorts kung ihinayon karong Hulyo Uno.
Giklaro ni Mayor Uy nga nabalaka siya nga basin ug mosaka ang kaso sa COVID-19 sa iyang syudad kung ablihan na ang mga pamatigayon tungod kay daghan nang mga tawo ang mosulod gikan sa mga lugar nga taas ang kaso.
Tungod niini, gihugtan ang health screening sa tanang mga mosulod sa ilang lugar.
Una niini, gibutyag sa Mayor nga dunay duha ka indibidwal nga Overseas Filipino Workers (OFWs) nga nagpositibo sa maong balatian nga niuli sa IGACOS.
RadyoMaN Bernard Pantallon
