Davao City – Gipailawom sa state of calamity ang Island Garden City of Samal human nga kapin 500% ang pagsaka sa kaso sa dengue kung itandi niadtong nakalabayng tuig 2018.
Sa report gikan sa Epidemiology & Surveillance Unit sa IGACOS CHO nga gikan Enero hangtod Hunyo 2019 nakatala og 249 ka kaso sa dengue ug duha ka mga bata ang kumpirmadong patay.
Nanguna ang Samal District sa pinakaataas nga kaso nga anaa sa 170 dengue cases, 169 ka dengue cases sa Babak District ug 90 dengue cases sa Kaputian District.
Sa interbyu sa RMN Davao kang IGACOS Mayor Al David Uy nga nag-request siya og resolusyon sa konseho nga ipailawom ang ilahang syudad sa state of calamity aron magamit sa mga barangays ang pondo batok sa nagkataas nga ihap sa kaso sa dengue.
“Dili na namo gusto palalaon pa ang sitwasyon. Since naka-declare nata og outbreak naa tay giandam nga pondo para sa dengue testing kits, medicines, palit ta og additional fogging machines and mga insect repelants para gamiton sa atoang mga estudyante,” matud sa mayor.
Sumala ni Uy nga target gayod nila karon nga malimpyuhan ang mga tulunghaan diin sagad sa mga bata didto giingong napaakan sa mga lamok nga nagdala’g dengue base sa nadawat niini nga report.
Gibutyag sa mayor nga mukasa sila’g massive clean-up drive ilabina nga karon nga ting-ulan.
Gimanduan niini ang CHO nga kanunayon ang himuong fogging sa mga eskwelahan ug sa mga purok ug information dissemination aron malikayan ang dengue.
Nanawagan kini sa katawhan nga dili magkumpyansa og mukonsulta gilayon sa doktor kung adunay hilanat.
Dugang sa alkalde nga kanunayon ang pagpalimyo sa tagsa-tagsa ka mga panimalay.
RadyoMaN Aimee Guinita
