Ihap sa kaso sa COVID-19 sa Zamboanga del Sur nisutoy, unom ka bag-ong kaso nadugang sa listahan

41

Pagadian City – Sa padayong obserbasyon sa Modified General Community Quarantine (MGCQ) ug walay hunong nga pagdawat sa mga Locally Stranded Individuals (LSIs) ug Returning Overseas Filipinos (ROF) sa Zamboanga del Sur nisutoy ang ihap sa kaso sa Coronavirus disease 2019 sa probinsya.
Kagahapon unom ka bag-ong kaso sa Covid-19 ang natala sa Integrated Provincial Health Office kun (IPHO) nga nga benepisyaryo sa Hatid Probinsya ug Balik Probinsya Program sa gobyerno.
Nagpositibo sa maong kagaw ang 22 anyos nga lalaki nga taga Prk. Kamatis, Brgy. Lumad ning syudad nga bag-o lang naabot gikan sa Mandaue Cebu City niadtong Hulyo 6, 2020 sakay sa lupad sa Philippine Airlines.
Laing kaso usab ang natala sa lungsod sa Tambulig partikyular sa Prk.Santol, Brgy. Riverside sa maong lungsod diin ang nataptan sa virus 36-anyos nga lalaki nga naka-abot niadtong Hulyo 7, 2020 gikan sa Quiapo, Manila pinaagi sa 2GO Shipping Lines nga nidunggo sa pantalan sa Cagayan de Oro Seaport.
Kompirmado usab nga Covid-19 ang nitakboy sa 22 anyos nga lalaki nga taga prk.4, Balintawak, Aurora, ning probinsya nga nidangat sa syudad niadtong Hulyo 7, 2020 gikan sa Navotas, Manila pinaagi sa Cebu Pacific.
Nalakip usab sa listahan sa nagpositibo ang 22-anyos nga lalaki nga taga- Prk.5, Boniao, Mahayag, nga naabot sa probinsya niadtong Hulyo 5, 2020 gikan sa Sta. Cruz, Manila pinaagi sa Philippine Airlines.
Nakatala usab sa unang kaso sa Covid-19 ang lungsod sa Midsalip dihang nagpositibo sa swab test ang 19-anyos nga babaye nga taga Brgy. Canipay Sur, Midsalip, nga naabot niadtong Hulyo 3, 2020 gikan sa Bicutan, Taguig City pinaagi sa Cebu Pacific.
Usa ka Returuning Overseas Filipino usab ang naapil sa nagpositibo nga taga- Prk. Mansanitas, Brgy. Dipolo, Molave, ang maong pasyente 52 -anyos nga babaye nga gikan sa Metro Manila.
Ang nahisgutang mga pasyente pulos asymptomatic ug kasamtangan nga gimonitor karon sa nagkadaiyang isolation facility sa ilang lugar.
Gumikan sa maong nadugang mikabat na sa 32 ang kinatibuk-ang kaso sa Covid-19 sa tibuok probinsya ug 21 sa maong ihap ang active cases.


Facebook Comments