General Santos City–Giangkon karon ni Glenville Gonzales- Administrator sa Dr. Jorge Royeca Hospital nga medyo alarming karon ang ang gidaghanon sa mga naadmitar sa covid center nga nahimutang sa Dr. Jorge Royeca Hospital (DJRH).
Apan gipaklaro ni Gonzales nga wala kini magpasabot nga puro positibo ang tanang mga nakaadmitar sa maong covid center kondili mitaas ang ihap sa mga naka-confine nga suspected og probable patient.
Nasayran nga siyam ka mga lawak ang gigahin alang sa mga pasyente sa covid center apan sa karon usa nalang ang nahibiling bakante tungod kay walo na ang mga pasyente nga naka-confine.
Gibutyag ni Gonzales nga sa walo ka mga pasyente duha niini ang nagpabiling positibo ug karon padayon nga nakaadmit sa maong ospital.
Samtang ang uban niini ginapaabot pa ang resulta sa swab test aron masuta kung positibo o dili.
Kahibaluan nga nakaabot na sa upat ang ihap sa mga nahimong positibo sulod sa syudad kung asa ang duha kanila ang una nang nakarekober og nakapauli na sa ilang panimalay.
Samtang ang bahin sa mga pasyente nga dili covid 19 case duna pay mga bakante og wala pa milapas sa bed capacity ang ihap sa mga pasyente. Nasayran nga anaa sa 100 bed ang kapasidad sa Dr. JORGE ROYECA HOSPITAL kung asa anaa pa lang karon sa 92 ang mga admitted.
Gitin-aw usab ni Glen Gonzales nga bisan sa mga pasyente sa ospital ginapatuman usab ang physical distancing hinungdan nga gidid-an na ang magtapad-tapad sa matag katre.(JB)
