Pagadian City – Padayon ang gihimong pagpaniid sa City Health Office (CHO) sa dili moubos sa napulo ka tawo nga nahibiling Persons Under Monitoring (PUM) sa tibuok syudad gumikan sa Coronavirus Disease 2019 (COVID-19).
Sa pinakaulahi nga datos nga gipagawas sa CHO pinaagi sa interview sa RMN-DXPR , moabot na sa duol 14 ang natala nga PUM sa syudad nga kasamtangang nipailalom sa ilang 14-day home quarantine.
Gikompirma ni Dr. Ceniza ang mga PUM gikan sa laing nasod nga apektado sa COVID-19 ug boluntaryo nga nisumitir sa ilang kaugalingon nga mag-self quarantine.
Samtang giawhag usab ni Ceniza ang Barangay Emergency Response Team sa pagmonitor sa PUM nga anaa sa ilang lugar.
Gipaklaro usab ni Dr. Ceniza nga hangtud karon luwas gihapon ang tibuok syudad sa maong sakit ug pulos walay mga sintomas nga gibati ang mga PUM.
Nagtinabangay karon ang City Health Offices, City/Rural Health Units, mga pribado ug pampubliko nga ospital uban ang nagkadaiyang ahensiya sa gobyerno sa gipakusog nga disease surveillance, istrikto nga pagsusi sa sakit lakip na control implementation sa syudad.
Gipahinumduman usab ang mga ospital dili balibaran ang mga pasyente nga modanguo kanila nga dunay sintomas sa Covid-19.
