Roxas City, Capiz – Kapin sa 300 ka mga seminarista gikan sa bug-os nga Kabisayaan ang magatambong sa pagahiwaton nga 12th Gathering of Theology Seminarians in the Visayas (GTSV) sa Sancta Maria Mater et Regina Seminarium (SMMRS) sa Cagay, Roxas City.
Ang 5- day activity nga magasugod subong nga adlaw sang Lunes, Oktubre 21, tubtob sa Biyernes, October 25, ang magapabakod sang “sense of brotherhood” sang mga kalalakihan nga gina-porma agud mangin mga maayo nga mga pari nga magaserbisyo sa Diyos, sa Simbahan kag sa komunidad.
Pagatambungan sang mga seminarista gikan sa apat ka mga mayor nga seminaryo sa Bisayas nga ginalakipan sang Sancta Maria Mater et Regina Seminarium sang Capiz, St. Joseph Regional Seminary sang Arkidiyosesis sang Jaro, Seminario Mayor de San Carlos sang Arkidiyosesis sang Cebu kag St. John the Evangelist School of Theology sang Arkidiyosesis sang Palo.
Si Archbishop Advincula amo naman ang magapanguna sa selebrasyon sang santos nga misa sa opening day sang 12th Gathering of Theology Seminarians in the Visayas alas-singko karon sa hapon.
Masiling man nga ang ini nga pagtililipon ang mangin oportunidad sang bag-o nga henerasyon sang mga manug-pari para maghiliugyon labi na gid sa madamo nga mga isyu nga gina-atubang sang Simbahan.
Madamo sang mga isyu nga gina-atubang ang mga pumuluyo sa Bisayas- labi na gid ang mga pamatan-on kag ang mga imol – nga dapat gid atubangon man sang Iglesia Katolika.
Isa na diri ang pagtaas sang kaso sang mga naga-hikog ukon suicide. Suno sa Police Regional Office 6, may natala na nga 147 nga suicide cases sa bilog nga Western Visayas sa sulod gid lamang sang walo ka bulan sang sini nga tuig (January-August 2019).
Suno kay Capiz Archbishop Most Rev. Jose F. Advincula, Jr. D.D. sa iya pastoral letter sang nag-ligad nga Hulyo, dapat ipaluntad sang mga tumuluo ang “kultura sang presensiya” ukon ang “culture of presence” sa pagsumpong sa sunud-sunud nga kaso sang suicide.
Sa pihak nga bahin, isa man ka concern sang simbahan sa Kabisayaan ang mga kaso sang panglugos labi na gid sa isla sang Negros bangud sa padayon nga pagbinakbakanay sang mga armado nga pwersa sang estado kag sang mga sari-sari nga rebelde nga mga grupo.
Sa iya man nga Pastoral Letter sini nga Agosto, nagpanawagan si Most Rev. Gerardo Alminaza, D.D., Obispo sang Diyosesis sang San Carlos sa Negros nga dapat mangin kaisa ang mga Kristiyano sa pagpatigayon sang hustisya kag paghidaet sa katawhan.
via- Sem. Jomel Lamila & Sem. Ted Tuvera
