Patay ang ika 13 ka drug pusher atol sa drug buy bust operation sa Carmen Police Station mga alas 3:30 kaganinang kadlawon sa Zone 5, Saint Therese Street, Barangay Kauswagan ning syudad sa Cagayan de Oro.
Matud ni Carmen Police Investigator Jayson Landar nga ang napatay mao si Jimboy Amodia alias Black Jack, 30 anyos nga taga Lapaz 1, Lapasan.
Gibutyag ni Landar nga misukol ang maong suspek ug nagpabuto sa iyang armas sa dihang nakamatikod kini nga police ang nagpalit kaniyag illegal drugs.
Apan matud ni Landar nga dihang naigo na ang maong suspek sa return fire sa ilang police operatives, ila pa kining gidala sa J.R. Borja General Hospital aron pagsalbar sa iyang kinabuhi.
Apan ang maong suspek, dead on arrival sa City hospital human nakaangkon sa duha ka samad pinusilan sa iyang dughan.
Narecover sa SOCO sa crime scene ang 38 ka libre nga pistola gikan sa maong suspek ug pipila ka basiyo sa bala sa 9mm pistol.
Nakuha usab sa mga police gikan sa maong suspek ang 500 pesos buy bust money ug usa ka pakete sa illegal drugs.
