Natala ang ika-7 nga kumpirmadong kaso sa COVID-19 sa Bukidnon ug pinaka-unang kaso para sa lungsod sa Quezon.
Kini human nga nagpositibo sa COVID-19 ang usa ka 16-anyos nga residente sa Caloocan City nga mobiyahe unta sa Brgy. Butong, Quezon,Bukidnon.
Sa kasamtangan, naka-confine kini sa Bukidnon Provincial Medical Center (B PMC).
Matud sa opisyal nga pamahayag sa LGU-Quezon, nga uban ang iyang inahan ug igsuon, misakay kini sa AirAsia flight Z2691 kaniadtong Hunyo 8, 2020 gikan sa Manila ug niabot sa Laguindingan Airport pagka 9 AM.
Pagka 8:41 PM, gikuha sila sa mga personahe sa Munisipyo sa Quezon, Bukidnon ug miabot sila sa Malaybalay City alas 12 sa tungang gabii.
Ni-agi ang maong pamilya sa Rapid Test for Antibodies kaniadtong Martes, ug siya lamang ang nagpositibo sa maong Rapid Test, hinungdan nga gipasulod pud siya sa RT-PCR test for COVID-19.
Kagahapon, ni-gawas ang resulta nga positibo, sumala sa Provincial Health Office.
Sukad sa ilang pag-abot sa Malaybalay, wala na gipabiyahe pag-usab ang pasyente ug ang iyang pamilya.
Gi-isolate usab ang iyang inahan ug igsuon sa Provincial Isolation Unit sa Malaybalay City.
Nahimutang sa Barangay Isolation Units ang walo (8) pa ka taga-Quezon nga posibleng iyang naka-himamat pagbiyahe gikan sa Cagayan de Oro City hangtod sa triage sa Malaybalay.
Padayon usab ang contact tracing sa uban pang mga tawo nga posibleng nakahimamat sa maong positibong kaso.
Samtang sa interview sa RMN ngadto kang PCL Ex-Officio Board Member Atty. Oliver Baba Garcia, ang chairman sa Committee on Repatration sa Bukidnon, gibutyag niini nga dili problema ang contact tracing tungod kay isolated ug naka-quarantine ang mga nagpositibo sa virus.
Matud niya nga wala usab kini naka-abot sa ilang tagsa-tagsa ka mga dapit ug wala usab nila nakahimamat ang ilang mga pamilya.
Malipayon usab nga gipa-abot ni Board Member Garcia sa publiko nga tanang nagpositibo sa COVID-19 sa Bukidnon mga asymptomatic ug walay kuyaw sa ilang kahimtang.
