BACOLOD CITY – Ginpangunahan ni Department of Public Works and Highways (DPWH) Secretary Mark Villar ang inagurasyon sini nga adlaw sang ikaduha nga flyover sa Bacolod City.
Ang amo nga flyover ang nahamtang sa dalan Araneta-Magsaysay ang ginapaabot nga makabulig pahagan-hagan sang trapiko sa mga salakyan nga nagahalin sa southern part sang ciudad.
Ginpasalamatan ni Bacolod City Lone District Cong. Greg Gasataya si Villar sa personal niya sini nga pagpadulong sa Bacolod para sa inagurasyon sang Araneta-Magsaysay flyover.
Nagapati si Gasataya nga pinaagi sini nga proyekto, mabuhinan na ang pag-ginutok sang salakyan sa amo nga area.
Magluwas dira, plano man ni Gasataya nga magpangayo sang duha pa gid ka flyover nga ibutang sa Lopues East area kag Bangga Cory. (Photo by Carla Cañet)
