Davao City – Sagad walay nasalbar bisan usa ang 34 ka mga apektadong pamilya kinsa anaa karon sa ngapahiluna sa evacuation center sa Brgy. Ilang ning syudad sa Davao.
Kini subay sa miulbong sunog alas-5:30 sa buntag kagahapong adlawa partikular sa Purok Sto. Rosario NSV, Brgy. Ilang.
Sa interbyu kang Viola Galas, biktima sa sunog, wala silay nasalbar gumikan tulog sila niadtong tungora.
Hinuon, gibutyag niini nga nakadawat na sila og pasiunang hinabang gikan sa barangay ug lokal nga panggamhanan apan nanginahanglan gihapon sila og gamit pangluto alang sa mga nadawat nga noodles ug delata.
Samtang matud sa laing biktima nga si Rosita Goma, gamit pang skwela ang ilang gikinahanglan sama sa sapatos ug sanina alang sa iyang kindergarten nga apo nga si Stacy Emyao nunot nga abli-klase na karong adlawa.
Sa interbyu kang Stacy, muskwela gihapon kini bisan wala lapis ug papel lang ang dala.
“Muskwela gihapon ko (bisan walay uniform ug noteblook) kay para makatuon ko,” segun niini.
Sa record sa Department of Social Welfare and Development, 19 ka mga panimalay ang totally damaged samtang tulo ang partially damaged diin gibana-banaang anaa sa P6.1M ang kantidad sa damyos.
Nasayran nga boarder, renters ug house owners ang apektado niini kinsa padayon usab nanawagan og hinabang gikan sa publiko.
RadyoMaN Jason Amisola / RadyoMaN Joel Viray
