Davao City – Nakahilak sa pagpasalamat ang usa ka residente nga nasunogan sa Brgy. Ilang, Davao City human nadawat ang dugang hinabang pinaagi sa DXDC Operation Tabang.
Sa pakighinabi kang alyas Rose atol sa Serbisyong Straight to the Point, malaumon kini nga makabangon gikan sa mapait nga kalamidad.
“Sa tanan hinabang, wala mi nagdahom nga daghan nadawat alang sa mga anak ug sakong sarili… Ang Ginoo nay bahala sa inyo,” segun ni alyas Rose.
Karong adlawa, mitunol ang team DXDC RMN Davao og mga hinabang sama sa bugas, canned goods, used clothing ug uban pang gamit nga pwedeng magamit sa mga nasunogan.
Dugang nakadawat usab ang usa ka tatay nga nawad-an og panginabuhian.
“Salamat kaayo sa mga hinabang kutob sa mga nitabang sa amoa… Nahurot gyud akong gamit walay nabilin, akong tindahan nasunog,” segun ni alyas Tatay Bert.
Kahinumduman nga anaa sa kapin 30 ka mga pamilya ang apektado sa miulbong sunog sa maong brgy. niadtong June 2, 2019, adlawng Domingo.
Samtang mapasalamaton usab ang TEAM RMN Davao ngadto sa mga mihatag sa ilang mga hinabang ug andam gihapon mudawat ang RMN Foundation alang sa uban pang hinabang aron sa pagpangandam nga aduna dayon matunol sa mga kaigsuunang maapektuhan sa bisan unsang kalamidad gumikan di gayud matagna kanus-a kini muigo.
Alang sa inyong mga donasyon, mapa-cash, used clothes, pagkaon ug uban pa, mamahimong ipadala kini sa sibyahanan nga nahimutang sa Anda cor. Bonifacio street, Davao City pinaagi usab sa RMN foundation.
RadyoMaN Renz Barbarona
