Malungon, Sarangani Province–Positibong giila sa iyang mga kabanay ang babayeng una ng nakit-ang patay sa Sitio Buayan, Brgy. Malandag, Malungon, Sarangni Province milabay’ng adlaw.
Giila ni Police Lt. Col. Edgar Yago, hepe sa Malungon Police Station ang biktima nga si Farida Limba Kasan, hingkod ang pangidaron nga temporaryong nagpuyo sa Brgy. Calumpang, Gensan.
Subay matud pa sa pamahayag sa kabanay sa biktima, wala sila nasayud nga aduna kini ginabisita sa Bureau of Correction kung asa adunay narekober nga visitor’s pass sa lawas sa biktima nga gihinganlan ug Charita Linosa.
Dugang pamahayag ni Lt. Col. Yago nga blangko matud pa ang kabanay sa biktima sa posibleng hinungdan sa pagpatay kaniya ug wala silay nasayran nga posibleng kaaway niini.
Matud usab sa igsuon sa biktima nga Agosto 4 pa dihang wala na makapa-uli ang biktima sa iyahang gipuy-an sa Brgy. Calumpang, wala usab sila masayud kung asa kini niadto ug kung si kinsa ang mga nakauban niini ayha pa kini nakaplagang patay.
Samtang ginatan-aw karon sa kapulisan nga motibo sa krimen mao ang posibleng kalambigitan niini sa illegal nga droga. Ilaha pa usab ginasuta kung aduna kini mga kasong gi-atubang kabahin na sa illegal drugs.(LVR)
