iFM Laoag – Naangay ti maysa nga “Indignation Rally” kontra iti Communist Party of the Philippines (CPP), New People’s Army (NPA) ken iti National Democratic Front (NDF) idi kalman Disiembre 26, 2019 iti Aurora Park, Laoag City, Ilocos Norte.
Nabuangay daytoy nga aktibidad iti partisipasion dagiti government ken non-government stakeholders, private sectors, ken dadduma pay nga organisasion iti probinsia kas iti panangsuportada ti kampanya iti agdama nga administrasion kontra kadagiti grupo a maibilang iti rebelde, terorismo, ken mangidadaulo ti pananggulgulo kadagiti nagduduma a komunidad.
Segun kenni Mr. Ismael Ali, Presidente ti Ilocos Norte United Muslim Association (INUMA), saanna a suportaran dagiti aniaman nga aktibidad a maiyannatup iti panagrebelde dagiti tattao kasta pay a kinondenarna dagiti grupo ti CPP ken NPA a kangrunaan a mangiyususwat kadagiti rebelion ken terorismo ditoy pagilian.
Aktibo pay a nakipagpartisipar ti grupo dagiti lider ti agtutubo a “KaLaSaG” wenno iti maawagan a Kabataan Laban Sa bawal na Gamot kas iti pannakaimula dagitoy nga impormasion kadakuada ket maimpluensiaanda dagiti padada nga agtutubo a laksidenda iti NPA, CPP ken NDF a grupo.
Daytoy nga aktibidad ket maysa kadagiti mandato nga ipatpatungpal ti gobierno iti Department of Interior Local Government (DILG) babaen ti Memorandum Circular ken Executive Order No. 70 S. 2010 a nakibinnulig iti Philippine National Police tapnun adadda pay ti napintas iti koordinasion daytoy nga aktibidad iti intero a Pilipinas.
Kabayatanna, nakipagpaset met dagiti representative iti tumunggal istasion ti pulisia, ken iti local a gobierno ditoy intero nga Ilocos Norte kasta pay a nangiburay ti mensahe ni Mrs. Fanny Camalig Albano, maysa a rebel returnee ken agdama a Municipal Agriculture Officer iti LGU Dumalneg, Ilocos Norte. (Joe Anne Agustin, RMN News)
