Report ni: Jennifer Palomo Debaja
Ginpasidunggan sang long service award ang Ilongga sa Singapore sa iya tampad nga pagserbisyo sa pamilya sang amo sa sulod sang 28 ka tuig.
Nasorpresa gid si Maria Aida Procalla Somejo, 59 anyos, dalaga kag tumandok sang Brgy Ayuyan, Passi City sang nagbaton ini sang award kaupod ang iya amo kag ang kinagot sa apat sini ka ward nga daw halos siya na ang ginakilala nga iloy.
Kabahin ang Ilongga sa 19 tanan ka Foreign Domestic Helpers kag employers nga ginpasidunggan sa annual ceremony nga ginpatigayon sang Association of Employment Agencies sa Singapore para e honor ang outstanding performances sang mga foreign domestic workers sa ila tampad nga serbisyo sa tagsa ka mga amo sa sulod sang indi magnubo sa 10 ka tuig. Si Somejo ang recipient subong nga tuig sang longest-serving award.
Tuig 1990 sang nagpasimpalad bilang domestic worker sa Singapore si Maria Aida. Kag halos pamilya na ang trato sa iya sang mga amo matapos siya ang nagpadaku sa apat nila ka kabataan.
Sa pahayag ni Maria Aida, sa 28 ka tuig nga pagserbisyo sa pamilya sang amo, indi man maisip ang kaayo nga ginbulig sa iya kag sa iya mismo pamilya. Isa na diri ang paghatag sang bulig sang naguba ang ila balay nga ginlaslas ni bagyo Haiyan (Yolanda) sang tuig 2013.
Sa balor nga $1,300 Singapore dollars nga ginbulig sang nanay ni Ms. Choo kag sang isa pa ka utod sang amo, napatindog liwat sang pamilya Somejo ang ila balay.
