HINOBAAN, NEGROS OCCIDENTAL – Ginlabo sang isa ka bata ang iya kaugalingon nga iloy nga nagresulta sang kamatayon lakip na ang live-in sang biktima nga nasamaran kagab-i sa Brgy. Asia, banwa sang Hinobaan.
Nakilala ang mga biktima nga sanday Erlynda Dahildahil, 36 anyos ang edad, kasado kag Arjie Sanchez, 35 anyos, single, mag live in partner kag lunsay pumuluyo sang Purok 1, Brgy. Asia sang amo nga banwa.
Nakilala naman ang suspek nga si Argie Dahildahil, 25 anyos, soltero, pumuluyo man sang amo nga lugar kag anak sang biktima nga napatay.
Base sa imbestigasyon sang Hinobaan Municipal Police Station, natabo ang insidente mga las 11 kagab-i sa amo nga lugar kon diin ang anak mismo ni Erlynda nga si Argie amo ang nagpanglabo sa ila sa wala pa karon matumod nga rason.
Nag-angkon sang madamo nga patal nga pilas sa iya lawas ang biktima nga babayi nga amo ang gintunaan sang iya gilayon nga kamatayon.
Samtang ang iya naman live-in ang nag-angkon man sang madamo nga pilas sa iya lawas kag gindala sa Don Eleuterio Decena Memorial Hospital kon diin padayon ini karon nga ginabulong.
Angut sini, gilayon naman nga nadakpan sang pulis ang suspek kag narecover sa possession sang suspek ang kutsilyo nga iya gin-gamit sa pagpanglabo.
Ini siya detained na karon sa custodial facility sang Hinobaan MPS./dyHB BACOLOD
