BACOLOD CITY – Patay ang 17 anyos nga lalaki nga ginkilala kay Archie Odsigue matapos gin alegar ginluthang sang pulis nga na-destino sa Police station 8.
Base sa imbestigasyon sang Bacolod City Police Office Women’s and Children Protection Desk (BCPO-WCPD) sa pagpamuno ni SPO4 Arlene Torrendon, nagpangawat sang ‘scrap’ sa bahin sang Old Airport, Brgy Singcang si Archie sa diin, ginresponderan sang kapulisan sang station 8.
Gin-alegar nga nagtuyo sa pagpalupok sang pusil si Archie kag bangud sini, gin unahan siya sang pulis para dispanta lamang.
Apang, dimalas gid lamang bangud nga sa pagpalupok sang pulis, nag-igo sa semento ang bala kag nag-igo sa ulo sang 17 anyos rason nga gindala ini sa hospital apang sang ulihi ini ang napatay man.
Sa bahin sang Police Station 8, handa sila magkooperar sa pamilya ni Odsigue kag ginapasiguro nga ipaidalom sa imbestigasyon ang pulis nga responsable sa pagpalupok.
Samtang, indi naman magsanto sa imbestigasyon sang pulis bangud base sa pahayag sang iloy ni Archie nga si Chique, nagkuha lamang sang damog ang iya bata apang natabu-an nga nag-ulan, rason nga nagpasilong ini sa bahin sang old airport.
Ginklaro man sini nga wala nagapang-scrap ang iya bata bangud nagabulig ini sa iya sa pagbaligya sang isda.
Sa karon, nagalaum si Chique nga tamdon sang otoridad ang kahimu-an sang isa sa ila pulis agud maangkon ang hustiya. (In photo- Mother of Archie)
KON IKAW PAHAMBALON SIN-O NAGASUGID SANG MATUOD? ANG PULIS UKON ANG PAMILYA SANG BIKTIMA?
