BACOLOD CITY – ( Update ) Sa pagtinguha nga masalbar ang iya duha ka mga kabataan, rason nga wala na nakagwa pa sa ila puluy-an ang isa ka iloy gani ini ang napatay sa sunog nga natabo sadtong Sabado, las 11:40 sang gab-i sa Brgy. Villamonte, Bacolod City.
Ang biktima nakilala kay Hannah Mae Garaygay, 31 anyos ang edad, pumuluyo sang Makiling Street, Brgy. Villamonte kag may duha ka mga kabataan.
Suno sa kaingud sang biktima nga posible nagsugod ang kalayo sa kwarto ni Hannah Mae kon diin madasig nga naglapta ang kalayo sa iban pa nga bahin sang puluy-an.
Ginpahayag nga gintinguhaan pa ni Hannah nga salbaron ang iya 2 ka mga kabataan nga sang amo nga tinion, nagakatulog na.
Ang ginhimo sang biktima, iya sini ginpaagi sa grills sang bintana ang iya duha ka mga kabataan nga naga-edad 3 ka tuig kag 7 ka tuig bangod ara na sa pwertahan ang kalayo.
Gintungahaan pa sang biktima nga maka-gwa man sa grills apang indi ini maka-igo gani na-trap ini sa sulod sang ila kwarto.
Samtang, base naman sa initial investigation sang Bureau of Fire Protection ang kalayo naghalin sa kisame sang kwarto sang biktima.
Napalong ang kalayo sang bombero las 11:57 na sang gab-i.
Sa pihak nga bahin, apesar sang makahalanusbo nga hitabo, may mga bentahuso pa nga nagkawat sang 2 ka saku sang bugas halin sa tiyangge sa atubang sang nasunog nga balay sang biktima.
Nahibaluan nga si Hannah Mae ang kamagulangan nga anak sang Bacolod Department of Public Services officer-in-charge nga si Engineer Ruel Garaygay.
Pila ka oras antis natabo ang trahedya nakapost pa ini sa Facebook sang tinaga ‘I Love You’ sa iya nga iloy nga ato sa Estados Unidos. /dyHB BACOLOD
