BACOLOD CITY – ( Update ) Gin-ako sang iloy sang hold-up suspek nga natiruhan kag napatay kagab-i sa Brgy. Villamonte diri sa ciudad sang Bacolod nga may mga kaso na gid man sadto ang iya bata.
Suno kay Josephine Fulgo, iloy sang suspek nga napatay nga si Juniben Fulgo, sa interview sang DYHB nga nakahibalo siya nga may record ang iya bata sa kaso nga illegal drugs kag mahilig ini mag-barkada.
Apang siling niya nga indi siya sigurado nga mahimo sang iya bata ang pag-commit sang kaangay nga krimen.
Madumduman nga si Juniben ang natiruhan pasado las onse kagab-i sa Burgos Extension, Brgy. Villamonte matapos nga ini siya kag ang iya upod nga si Jan-jan Beatingo ang ginlagas kag gindakup sang mga katapo sang Police Station bangud ginaalegar ini sila ang nagpanghold-up sang duha ka mga babayi sa area sang 10th Street, Brgy. 7 pasado las 8 kagab-i.
Nakapalagyo ang upod ni Juniben matapos wala ini naigo sang pagtiro sa iya sang pulis samtang ini siya ang naigo sa iya hawak, gindala sa Corazon Locsin Montelibano Memorial Regional Hospital apang napatay may mga las 3:46 sini nga kaagahon.
Pahayag sang iloy sang suspek nga wala naman ini sang plano magapasaka sang kaso batuk sa pulis nga nakatiro./dyHB BACOLOD
