Tiniyak ni Senate President Chiz Escudero na hindi maaapektuhan ng paglilitis ng International Criminal Court (ICC) kay dating Pangulong Rodrigo Duterte ang schedule ng impeachment trial laban kay Vice President Sara Duterte.
Binigyang-diin ni Escudero na walang batas na nag-uutos na ipagpaliban ang impeachment trial dahil may nangyayaring paglilitis sa ICC at dahil may kilos-protesta.
Kung sakali namang nasa The Netherlands si VP Sara sa panahon ng trial nito sa Senado ay nilinaw ni Escudero na karapatan ito ng bise presidente at hindi naman obligadong humarap sa impeachment trial si VP Duterte.
Dagdag pa ng Senate President, wala rin sa batas na nagbabawal sa vice President na humarap sa ICC bilang abogado ng kaniyang amang dating pangulo.
Sa panukalang timeline ni Escudero ay sa Hulyo 30 planong simulan ang paglilitis kay VP Duterte na target tapusin sa Oktubre.
