Gi-inspeksiyon ni Senator Juan Miguel Zubiri ang Drug Abuse Rehabilitation Treatment Center (DARTC) nga nahimutang sa Purok 17, Casisang, ning siyudad sa Malaybalay kaniadtong Miyerkules.
Uban sa senador sa iyang pagbisita si Governor Jose Ma. R. Zubiri, Jr. ug ang mga representante gikan sa Department of Health kon DOH-Region 10.
Ang mao nga pag-inspeksiyon isip pagpangandam sa himoon nga inauguration nga pangunahan ni Pangulong Rodrigo Duterte sa maong pasilidad.
Una nang nigawas ang taho nga karong Hulyo 16, pangunahan sa pangulo ang mao nga inagurasyon.
Gi-imbitahan usab ang mga barangay kapitan sa probinsya sa Bukidnon sa himoon nga kalihukan.
Nasayran nga karong Dominggo, Hulyo 8, nakatakdang mag-inspeksiyon usab si Presidential Communications Operations Secretary Martin Andanar sa mao nga drug abuse treatment and rehabilitation center human sa iyang pagpakigtagbo sa mga kabatan-on sa probinsya nga kabahin usab sa iyang kampanya nga batukan ang fake news kon pekeng balita.
