General Santos City—Hustisya ang gustong ma-angkon ni alyas Nanay Neneng sa kamatayon sa iyang anak nga si Cliff Ian Bermoy nga nanimuyo sa Employees Village Brgy.Fatima, Gensan kansa napusilan patay sa operasyon sa kapulisan niadtong milabay nga adlaw sulod mismo sa ilang panimalay pasado ala 1:00 sa hapon.
Matud pa sa inahan nga misukol kuno ang iyang anak sa otoridad apan gihingusgan niini nga walay kamatuoran ang maong alegasyon gumikan kay walay armas ang iyang anak.
Aminado usab ang nasampit nga inahan nga kaniadto lambigit ang iyang anak sa droga apan nakadesisyon kini nga magbag-o na sa kinabuhi tungod sa iyang pamilya.
Dugang pamahayag ni alyas Nanay Neneng nga sukad nag bag-o na ang iyang anak namanday nalang kini ug balay aron lamang dunay mahatag nga pagkaon sa iyang pamilya.
Nasayran nga manglaba unta ang target suspek sa kapulisan niadtong higayona dihang miabot ang kapulisan nga magpatuman unta ug operasyon apan misuway matud pa ug sukol sa kapulisan ang suspek mao nga napusilan nga hinungdan sa iyang kamatayon.
Samtang nagtuo usab ang inahan nga gibutangan lang ang iyang anak ug droga ug armas atol sa operasyon aron lamang dunay maipakitang ebedensiya ang otoridad. (Reynald Timario)
