General Santos City—patay ang inahan ug duha niya ka mga anak human nasunog ang ilang panimalay sa Purok 1, Blaan Community, Barangay Labangal, Gensan.
Mga biktima nailhang silang si Jovelyn Gamez, 35, anak niini nga silang si Antony Gamez, 3 anyos ug Earl Gamez, 5 anyos, pulos residenti sa samang lugar.
Pasado alas 12 :00 sa tungang gabie, Martes, dihang kalit lang miulbo ang kalayo sa panimalay sa mga biktima. Nakasinggit pa ang ginang ug tabang sa mga silingan apan tungod sa kadako sa kalayo, wala na gyud nila kini matabang.
Subay sa mga silingan, dunay nadunggan nga buto sulod sa panimalay sa mga nahisgutan dayon gisundan kini sa dakong pag ulbo sa kalayo.
Sa inisyal nga imbistigasyon sa Bureau of Fire Protection Gensan pinaagi ni fire investigator Macacuna Tumambiling, alas 12:45 ang takna sa kabungaton dihang nakadawat sila ug report bahin sa maong sunog, 3 minutos dihang nakaabot ang fire truck sa lugar, apan dili na gyud matabang ang kalayo human naapil na ang laing panimalay tapad niini.
Ala 1:00 pasado na dihang gideklarang fire out sa lugar. Nakit-an ang napaig na nga lawas sa duha ka bata sulod sa kwarto, samtang ang inahan anaa sa sulod sa CR.
Dugang pagbutyag ni Tumambiling nga posibling na trap ang inahan mao nga wala na kini nakagawas ug wala na usab niini nakuha ang iyang duha ka mga anak.
Sa karon padayon ang gihimong imbistigasyon kalabutan sa insidenti.
