Patay ang usa ka inahan ug upat niya ka mga anak atol sa nahitabong sunog sa Purok 4, Fuentes Barangay Maria Cristina, Iligan City mga alas 3 kagahapon sa kadlawon.
Matud sa RMN Iligan nga ang inahang namatay mao si Elizabeth Baricuatro, 35 anyos, samtang ang iyang upat ka anak mao silang Francis, Jethan, Nathaniel ug Xander.
Gibutyag ni SFO2 Renaldo Maliao, fire investigator sa BFP nga ang maong mga biktima anaa sa sala nangatulog dihang nahitabo ang maong insidente.
Matud pa ni Maliao nga ang amahan nga si Alan Baricuatro ang bag-ohay pa nakalarga paingon sa Manila aron manarbaho sa overseas dihang nahitabo ang sunog.
Nagsugod ang sunog mga alas 3:29 sa kadlawon sa balay ni Jocelyn Alcober diin misaka kini sa 3rd alarm.
Daling miresponde ang kabomberohan kun diin siyam ka mga firetrucks ang miresponde.
Sa initial nga imbestigasyon, 11 ka mga balay nga naglangkob sa 17 ka mga pamilya o 57 ka mga indibidwal ang nabiktima sa maong sunog.
Posibleng faulty electrical wiring ang gitan-aw sa mga otoridad nga maoy hinungdan sa sunog.
Gidugang usab sa RMN Iligan nga ang patayng lawas sa mga biktima anaa karon sa Capin Funeral Homes samtang ang mga naapektuhang residente naa karon sa Multi purpose building sa Barangay Maria Cristina, Iligan City.
