BACOLOD CITY – Kapin 200 ka mga police personnel ang natalana nga iga-deploy sang Bacolod City Police Office para sa pagbukas sang Bacolod Chicken Inasal Festival sa maabot na Mayo 5 angut sa 80th Charter Anniversary sang Bacolod.
Wala labot sini, ginpahayag ni festival chairman, Councilor Cindy Rojas nga ang Bacolod Traffic Authority Office magapatigayon man sang traffic rerouting scheme.
Kapin 100 ka mga traffic personnel ang igadeploy sang BTAO agud nga amo ang maga-dirihir sa event site nga igapahamtang sa Araneta Street.
Suno kay Rojas nga ang mayor nga katuyuan sang Bacolod Chicken Inasal Festival amo nga ma-promote ang food tourism kag ma imbitar ang mga bisita nga tilawan ang inasal sang Bacolod.
Kabahin sang kahiwatan amo ang pagbutang sang 300 meters nga kalabaon sang chicken barbecue grill ukon “sulugbahan” halin sa Golden Diamond Jubilee Tower sa Bacolod City Public Plaza pakadto sa San Sebastian Street.
Diri iga-sugba ang kapin 3 mil ka stick sang chicken inasal.
Sa karon may kapin sa 25 na ka mga manugbaligya sang inasal subong man nga establishments ang nag-confirm nga magapasakup sa amo nga kahiwatan.
Samtang, ang rerouting scheme igapost sa social media sa maabot nga Lunes para mangin guide sang commuters kag motorista./dyHB BACOLOD
