Davao City – Mabulokong mga costumes, pagpasundayag sa tradisyon, ug paghulagway sa istorya sa nagkadaiyang tribu sa syudad sa Davao.
Kini ang ‘Indak-Indak sa Kadayawan’ kun ang street dance festival – ang usa sa paborito ug kinaham nga aktibidad nga ginapahigayon atol sa pagsaulog sa Kadayawan Festival.
Ginahulagway niini ang tumong sa maong selebrasyon – ang mabungahong ani ingon man ang bahandi sa kultura sa syudad sa Davao.
Sa ika-33 nga tuig sa maong festival, mas engrande ang maong selebrasyon gumikan sa mas daku nga premyo nga nagkantidad og tunga sa milyon ka pesos alang sa mga mudaog sa parehong open category ug Davao City school-based category.
Gawas sa major prize aduna usay special prize nga laing P500,000 alang sa mapiling pinakadaku nga puntos.
Sumala ni Indak-Indak event organizer Harold Quibete, mas hatagan nila karon og bili ang foot works imbes sa props sa mga contingents.
“Sa grand showdown it weights 60% before its 70% ang 30% lang ang street dancing. Karon gihatagan nato og kabug-aton ang street dancing (40%) because the execom and LGU and prganizing committee nagatoo nga hatagan og hustisiya ngano gitawag nato ning Indak-Indak,” segun niini.
Karong tuiga 13 ka mga contingents ang magtigi aron masungkit ang first prize diin magperform sila og 4 minutos sa street dancing nga mahitabo sa Marco Polo ug Apo View banda samtang 5-8 mins performance alang sa final showdown sa Kadayawan Square sa Rizal Park.
Tino gayod nga kini lamang ang maong aktibidad nga nagatapok sa mga festival winners gikan sa nagkadaiyang lungsod ug probinsiya sa Mindanao rason nganong gitawag kini nga Mother of Festivals dinhi sa isla sa Mindanao.
RadyoMaN Jason Amisola
