Wala ginakabig sang Iloilo City Police Office nga maka-alarma ang sunod-sunod nga insidente sang pagpangluthang sa syudad sang Iloilo.
Ginpahayag ni ICPO spokesperson Shella Mae Sangrines, kinahanglan sang kongkreto nga mga interbensyon agud malikawan ang mga kaangay sini nga insidente.
Ginapa-review sa karon ni ICPO director Sr. Supt Henry Biñas ang deployment sang kapulisan kag kon diin nga lugar sa syudad ang nagakinahanglan sang masangkad nga police visibility kag pagpatrolya.
Kalakip man sa paga-ubrahon sang ICPO amo ang pagpasangkad sang anti-tambay campaign nga nagasakop sang tanan nga ordinansa kag kasuguan.
Sa karon, naka- hospital arrest na si PO2 Melvin Mocorro nga ginatudlo nag-ambush kay PO1 Dorben “Benjo” Acap sa Dulonan, Arevalo.
Samtang padayon naman nga ginapangita sang kapulisan si Teofisto Sebanta nga suspek sa pagluthang sa pamilya Jalandoni sa Laguda extension, Magsaysay Village, lapaz sang nakaligad nga gab-i nga gintunaan sang kamatayon sang 15 anyos nga bata nga lalaki.
