NEGROS OCCIDENTAL – Ginapanginwala karon sang New People’s Army – NPA nga sila ang responsible sa pagtiro patay sa manuglibod nga mag-amay nga taga-Bago City sa Brgy. Macagahay, Moises Padilla sadtong nagligad nga Domingo, Mayo 20, 2018.
Suno sa spokesperson sang Leonardo Panaligan Command sang NPA nga si Ka JB Regalado nga wala sang kahilabtanan ang LPC-NPA sa kamatayon sang mag-amay nga manuglibod nga taga Brgy. Poblacion, Bago City.
Pahayag ni Ka JB nga baliskad ini sa pasibangud ni NOPPO provincial director Rodolfo Castil nga ila ginakabig, kabutigan, malisyoso, black propaganda kag pag-musing gid lamang sa organisasyon sang ila grupo.
Pinaagi sa press release nga ginpadala sang LPC-NPA, ginpahayag ni Ka JB nga ginabusalan gid lamang ang baba ni Castil sa mga “hayagan nga krimen kag kalakasan” nga ginapanghimo sang ila ginakabig mga mapintas kag suod nga tinawo ni Mayor Magsie Peña sa Magallon./dyHB BACOLOD
