"INDI LANG ISA KA ADLAW KAG ISA KA ORAS KUNDI TATLO KA ADLAW ANG LINOG NGA NATABO SA PANAY SADTONG 1948"

Ginsaysay ni Lola Corazon Iturriaga sang DueƱas, Iloilo ang iya personal nga inagihan sang nag-igo sa Panay ang isa sa pinakamabaskog nga linog sa Pilipinas nga ginatawag kay Lady Kaykay.

Si Lola Corazon nagapanuigon na karun sang 85 anyos. Katorse anyos pa lamang ini sang natabo ang 8.2 magnitude nga “Lady Kaykay” sadtong 1948 sa diin ang sentro ara sa Anini-y Antique.

Suno sa iya, matapos nga mag-igo ang 8.2 magnitude nga linog, tatlo ka adlaw sila nga gintay-og sang mga mabaskog nga aftershock.


Ang tanan nga gamit sa ila balay nagkaladagdag kag ang iban nagkalaguba.

Sang amo nga tuig, wala pa sang mga highrise building gani ang ila lang nga ginakahadlukan amo ang paglitik sang duta.

“Abi mo kon diin kami gasaka? Sa truck na lang kay para nga kon maglinog malakat-lakat lang ang truck. Kag ang iban gakapyot sa riles [sang train] kay basi mag-abre ang duta kag magkalahulog…kay ang riles asta sa Capiz,” ang pahayag ni Lola Corazon.

Una na ginpahayag sang City DRRMO nga mga dalagko nga mga kalamidad ukon linog pareho sa Lady Kaykay may ginatawag nga recurring period gani dapat mahibaluan sang publiko kun ano ang natabu sa nakaligad kag mahandaan ang possible senaryo nga matabu.

Nahibaluan, kagab-i gintay-og naman sang 4.8 magnitude nga linog ang Iloilo kag bug-os nga isla sang Panay sa diin ang epicenter ara sa San Enrique, Iloilo.

Facebook Comments