Gina-validate na sang National Food Authority (NFA) ang report nga may yara sang pila ka local government units sa Negros Occidental nga nakabaton sang indi maayo nga bugas.
Sa interview sang DYHB kay NFA Bacolod-Negros Occidental Manager Josephine Venus Castillo, ginahibalo pa nila kun matuod ang amo nga balita apang iya ginapasiguro nga maayo ang bugas nga ila gin-release sa mga LGU.
Suno kay Castillo, well-milled ang ila bugas nga gikan sa Capiz, Antique kag Iloilo apang iya gin-ako nga kun kaisa, may yara gid sang makalusot nga indi maayo ilabi na ang mga nagakatuluan sang ulan sa ila nga bodega.
Ginpanugyanan sini sa mga LGU nga nakabaton sang indi maayo nga bugas nga ibalik na lang ini sa ila, bangud ila man ini nga islan.
Sa karun, isa na ang alkalde sang EB Magalona nga nagpanawag sa NFA tuhoy sa nabaton nila nga bugas nga nalakipan sang indi maayo.
Naubos na release sang NFA ang P1 million nga balor sang bugas nga ginhatag sang provincial government sa tagsa ka mga LGU sa probinsiya, samtang ang ciudad sang Bacolod ang nag-order naman sang 10,000 ka sako.
[image: image.png]
