MOISES PADILLA – Hugot nga ginapanginwala sang Leonardo Panaligan Central Command sang New People’s Army, NPA nga ila kahimuan ang natabo nga pagpang-straffing sa Quintin Remo, banwa sang Moises Padilla sadtong Enero 26 sang gab-i nga nagtuga sang kamatayon sang tag-iya sang balay kag isa ka estudyante.
Ini ang ginpagwa nga statement sang rebelding NPA pinaagi naman sa spokesperson sini nga si Ka Anne Jacinto.
Sa amo nga insidente napatay ang biktima nga si Elnica Arroz, 18 anyos ang edad, estudyante sang Guinpanaan National High School-Mamballo Extension Campus kag Rene Saludares alyas Katong.
Si Elnica ang naga-istar naman sa balay ni Rene Saludares, 33 anyos, may asawa kag pumuluyo sang Sitio Upper Mamballo, Quintin Remo.
Mga las 9:30 sang gab-i sadtong Enero 26 sang magapahuway na kuntani si Rene matapos nag-inom inom upod ang iya utod, ini sila ang nakabati sang tatlo ka lupok.
Naghingagaw pa kuntani nga magpanira sang pwertahan si Elnica apang ini sila ang ginpangtiro pa gid sang duha ka mga armado nga lalaki, naka bonet, naka military uniform kag may bitbit nga M-16 armalite rifle.
Ang ini nga krimen ang ginpasibangud nga kahimuan sang NPA kasunod nga ang amo nga area ang kilala nga hukmungan sang mga rebelde.
Suno kay Ka Anne indi matuod nga sila ang may kahimuan sini bangud nga wala man sa ila record si Rene.
Nagapati ang NPA nga kahimuan ini sang organisado nga mga tawo agud nga magtuga sang kahadlok sa lugar kag padihot agud nga tabunan ang matuod tuod nga mga kalakasan kag kinagamo nga nagaluntad sa banwa sang Moises Padilla./dyHB BACOLOD
