Davao City – Giklaro karon sa labaw sa DCPO Mobile Patrol Group (MPG) nga si PCI Benkalin Baluan nga makonsidera nilang isolated case ang nahitabong pagpabuto sa armas sa usa sa iyahang mga personahe didto sa may sa may Shrine Hills Matina ning syudad niadtong Dominggo.
Matud ni Baluan nga wala nag-representa ang maong salawayong pulis sa ilahang kinatibuk-ang unit.
Gibatbat ni Baluan nga wala nila gi-tolerate ang maling binuhatan ni PO1 Glonard Bryan Maneja gani gipahamtangan na kini’g silot ug nagatubang na kini’g kasong administratibo ug kriminal.
“Kanunay natong reminder sa ilaha nga ang baril last recourse gyod na siya kung ang atong kinabuhi ug kining atong giserbisyuhan in danger na gyod that’s the time nga mubunot ta sa atoang mga baril dili pang huraw nato ug pang-psywar nato kung maburyo ta kay makapatay ta’g tao,” segun ni Baluan.
Dili buot ni Baluan nga masubli pa ang maong insidente ilawom sa iyang liderato ug gipahimangno niini sa iyahang ginsakpan nga mamahimong responsable sa ilahang gikuptang mga armas bisan pa man off duty sila.
Nasayangan si Baluan sa maong pulis kay sa pagkaila niini tarong kini sa trabaho.
“Professional unta ni siya mutrabaho, instructionan nato maminaw pod ni, wala tay libog. Pagkahitaboa sa ilahang balay mismo kay nag-inom inom lagi daw siya pampatulog daw niya kay murag insomnia mao nasobraan unya sige’g yawyawan sa asawa mao tong naburyong to siya,” matud ni Baluan.
RadyoMaN Aimee Guinita
