Gipusil patay samtang nagkaon sulod sa merkado sa Purok 2, Brgy. Libertad, Quezon, Bukidnon ang intelligence officer sa Armed Forces of the Philippines nga si Corporal Rito Ogdoc sa 88th Infantry Battalion Philippine Army sa maong lalawigan.
Matud ni PO2 Erb Diaz, ang inbistigador sa Quezon Municipal Police Station nga gikan sa intelligence work si Ogdoc kauban ang usa pa ka sundalo, dihang misulod sila merkado aron mokaon samtang naghulat usab nga mohunong ang kusog nga ulan.
Apan dihang miadto sa CR ang kauban ni Ogdoc, kalit na lamang miduol ang usa ka wala mailang lalaki dayong pusil sa biktima sa ulo.
Gibutyag ni PO2 Diaz nga nadala pa sa hospital sa Bukidnon ang biktima apan gideklarar na kining dead on arrival.
Nagtuo usab ang mga otoridad nga usa ka Special Partisan Unit kon SPARU sa grupong New People’s Army ang mipusil patay kang Ogdoc, basi na usab sa ilang nakuhang impormasyon nga gideploy karon sa NPA ang ilang mga urban hit squad batok sa tropa sa gobyerno.
Nakuha usab sa crime scene ang usa ka slug gikan sa kalibre .45 nga armas nga gituhoang maoy gigamit sa suspek.
By: RadyoMaN Ellah Baculio
