Davao City – Ipahigayon ugmang adlawa, Setyembre 15, 2018 ang International Coastal Clean-Up (ICC).
Sa pagbisita ni SPO2 Francis Taleon sa Regional Maritime Unit XI sa programang Straight to the Point afternoon edition , gianunsyo niini nga adunay partisipasyon ang region XI sa maong aktibidad.
Nanawagan si Taleon ngadto sa publiko ilabi na sa mga lumulupyo duol sa kabaybayunan nga mupartisipar sa himuong aktibidad magsugod alas 6:30 sa buntag ugmang adlawa ug mamahimong makigkoordinar lang sa mga barangay alang sa uban pang mga impormasyon.
Tumong niini nga malimpyuhan ang kabaybayunan, makuha ang mga basura ug mapahinumduman ang komunidad nga dili magpataka og labay sa basura nga maoy hinungdan sa pagkaguba sa bahandi sa kadagatan ug maapektuhan ang panginabuhian sa mga mangingisda.
Alang sa mga interesadong musalmot, mamahimong magdala og sako, net bag o mga cellophane nga sudlan sa mga basurang makuha lakip na usab ballpen tungod adunay i fill-up nga form human sa aktibidad.
Pagasalmutan ang ICC sa mga Local Governtment Units, PNP, mga estudyante ug daghan pang uban.
Subay sa Presidential; Proclamation No. 470 nga gideklarang International Coastal Clean-Up Day ang ikatulong adlawng Sabado sa bulan sa Setyembre kada tuig sa pag obserba sa Global Coastal Clean-Up celebration.
RadyoMaN Renz Barbarona
