Napiling regional winner sa 2018 Search for Outstanding Government Workers alayon sa Presidential Lingkod Bayan Award ang focal person sa Indigenous Peoples kon IPs sa City Hall.
Tungod niini, gipahalipayan sa lokal nga kagamhanan ning syudad ubos sa administrasyon ni Mayor Oscar Moreno si Ms. Nena Undag-Lumandong, mas naila nga ‘Bae Rose’ sa Social Welfare and Development Office.
Si ‘Bae Rose’ gi-presentar ni Ms. Mimsy Mayuman, Officer-In-Charge sa Human Resource Management Office, uban nila Kagawad Ma. Lourdes Gaane, SK Federation President John Michael Seno ug mga department heads atol sa flagraising niadtong Lunes.
Nasayran nga pinaagi sa paningkamot ni ‘Bae Rose’, nahatagan niini og tingog ang sektor sa IPs sa Cagayan de Oro aron mapaabot ang mga serbisyo sa gobyerno sa syudad didto mismo sa ilang komunidad.
Isip pagdayeg sa mga talagsaong binuhatan sa mga indibidwal ug grupo nga nakapaambit sa kinatibuk-ang kalamboan sa nasud kon nation building, gitunol sa Civil Service Commission Region 10 ang Presidential Lingkod Bayan Award.
