Nakarekord sang isa ka kaso sang firework related injury ang Integrated Provincial Health Office sang South Cotabato sang Disyembre 25.
Suno kay Provincial Health Education and Promotion Officer Hannah Ebeo ang biktima ang isa ka 18-anyos nga lalaki nga halin sa banwa sang Polomolok kag indi direkta nga nagkapot sang palupok kundi naigo lamang ini.
Kwitis naman ang klase sang firecracker ang nakabiktima sa diin nakaangkon sang burn injury ang biktima.
May-angot sini, ginapahanumdom ni Ebeo ang mga pumuluyo nga maghalong kag mangin responsable sa paggamit sang firecrackers kag fireworks.
Ginaawhag man ni Ebeo ang tanan nga magpartisipar na lang sa community fireworks display sa lugar.
Ginarekomendar niya man ang paggamit sang alternatibo nga pamaagi sa pagsugata sang bag-ong tuig kapareho sang pagbusina, pagpukpok sang kaldero, pagpatugtog kag iban pa agud malikawan ang disgrasya.
