IPHO South Cotabato nakarekord sang walo ka kaso sang nagpositibo sa filariasis.

Nagpositibo sa balatian nga filariasis ang walo ka tawo sa Brgy. Maan sa banwa sang T`boli, South Cotabato base sa resulta sang filaria test strip kadungan sang ginpatigayon nga boarder operations sang Integrated Provincial Health Office sa nasambit nga barangay sang tinalikdan nga semana.
Apang suno kay Provincial Mosquito Borne Disease Coordinator Jose Barroquillo subject pa sa confirmation ang walo ka kaso paagi sa pagpaidalom sa mga ini sa nocturnal blood smearing kag sikyaron kon sa nasambit gid bala nga lugar nakuha sang mga biktima ang balatian.
Ginpahayag niya nga indi pa man makabig suno pa nga alarming ang kaso sang nasambit nga balatian tungod wala pa man sang deformities nga nakit-an sa pipila ka parte sang lawas sang mga biktima kapareho na lamang sang pagdaku sang tiil kag iban pa.
May-angot sini, nagpanghatag man sila sang mosquitero sa mga residente sa nasambit nga lugar.
Sa subong suno kay Barroquillo wala man sang diskusyon nga makakas ang status sang South Cotabato nga filaria free tungod may-yara pa man sang proseso kag may dapat basehan.
Nahibaluan nga gindeklarar nga filariasis-free sang 2013 ang South Cotabato.
Ginkumpirmar man ni Sir Barroquillo nga wala naman sang may nagpositibo sa balatian nga malaria sa ginpatigayon nga blood smearing.
Ang nasambit nga aktibidad sang IPHO ang kabahin sang pagsustain sa status sang probinsya nga malaria kag filaria free.