Natalana nga irekomendar sang Integrated Provincial Health Office (IPHO) sang South Cotabato ang paglift sang deklarasyon sang state of calamity tungod sa dengue outbreak matapos nga padayon ang pagnubo sang kaso sang nasambit nga balatian nga base sa report sang Provincial Epidemiology Surveillance Unit (PESU) yara na lamang sa 50 ang nagatuhaw nga panibag-o nga kaso kada semana.
Suno kay Provincial Health Officer Dr. Rogelio Aturdido Jr. ang rason sang pagnubo sang kaso sang balatian nga dengue ang tungod sa positibo nga resulta sang ginhimo nga aksyon paagi sa pagbinuligay sang PDRRMO, IPHO, C/MHO, BLGUs, RHUs, hospitals kag mga pumuluyo.
Lakip man sa istratehiya ang pagpatigayon sang press conferences, radio interviews, “recorida”, printing of tarpaulins and stickers, pagsinapol sa mga ABC Presidents and Councils, prevention and control measures kapareho sang “oplan kulob”, misting and fogging operations, NS1 testing on suspected cases kag iban pa.
Base sa ulihi nga datos nagalab-ot sa 6,097 ang kaso sang dengue sa probinsya nga mataas sang 13 porsyento kumparar sang nagligad nga tuig sa kapareho nga period kag yara sa 26 ang nabawian sang kabuhi.
Nagapanguna naman ang syudad sang Koronadal kag Surallah nga may madamo nga nabawian sang kabuhi nga yara sa 5 ginasundan sang Polomolok kag T`boli may tig 3; tig-duha naman sa banwa sang Banga, Sto. Nino, Tampakan, Norala, tig-isa sa banwa sang Tantangan kag Tupi kag wala naman sang narekord nga patay sa balatian nga dengue sa Lake Sebu.
Nahibaluan nga ginpaidalom sa state of calamity ang probinsya sang South Cotabato sang Hulyo 19 subong nga tuig.
Samtang suno kay Provincial Surveillance unit Officer Celia Lorenzo bisan malift na ang deklarasyon ginahingyo nila sa mga pumuluyo nga ipatuman gid ang search and destroy sa breeding place sang lamok nga nagadala sang balatian nga dengue.
