Tagkilaya an biktima na isa ka CHARLITA AMBEL ,57 anyos, residente nan Purok 10, Barangay Mat-i sakop sa syudad nan Surigao.Sumaya pa sa nakuha na impormasyon nan RMN DXRS , na nabangaan nan ido sa nakalabayng 6 ka bulan an biktima pero tungod sa rason sa kawad- on o wayay kwarta para ipatambay , ini nagpatandok lamang sa albolaryo rason sa pagkuyanap sa rabies sa ija lawas na miresulta sa ija kamatayon nan jadton milabay na Huybes, Pebrero 8,2018.Nahibaw – an isab nan RMN na human sa tuyo ka adlaw gikan sa pagbanga nan ido sa biktima an namatay an ido pero nagkumpyansa ra an biktimà sanan waya dajon magpatan -aw sa doktor. Tagbutyag kuman nan City Health Officer,Dr. Emmanuel Plandano na unta human sa pagkabanga sa biktima ini mipatan aw dajon sà suod na tambayanan para malikayan an pagkuyanap sa rabies sa lawas.Sa pagkakuman, an tanan mga membro sa pamilya nan biktima an taghatagan nan proteksyon kontra rabies sanan gipailayom sa pagmonitor o obserbasyon . Dugang pa sa nakuha na impormasyon nan RMN DXRS na human sa pagkamatay nan biktima an deretso na ini tagpalubong sa mga otoridad sanan waya na tugoti na mahaya pa oara malikayan an pagkuyànap sa amu na makamatay na virus.(RadyoMaN Jerson Fuentes)
