Isa ka 8 anyos na bata naligsan-patay sa Brgy. Sabang, Surigao City
Tagkilaya an biktima na si Hershiey Lisondra, 8 anyos, residente sa Purok 7, Brgy. Sabang, Surigao City.
Sa inisyal na imbestigasyon nan mga otoridad, adisir nahitabo an disgrasya, an bata an sakay sa tricycle gikan sa eskuwelahan ug pauli na unta sa ila panimayay. Sa pagkanaug sa tricycle, diretso ini na mitabok agi sa atubangan nan tricycle ug aksidente na nabanggan sa isa ka Isuzu Bighorn SUV na may plate number YDX 314, base sa record sa Land Transportation Office naka-rehistro ini sa isa ka Carlos Go nan Muntinlupa City.
Sa asoy sa mga nakasaksi, an sakyanan na nakabangga an nohunong pa pero dali na miikyas pasingod sa direksiyon sa Brgy. Lipata. An bata na si Lisondra an nadaya pa sa Caraga Regional Hospital pero human an pipila ka minuto an nakutluan sa kinabuhi. Sa tagkahitabuan, nagkanat pa an dugo nan biktima sa dayan.
Padajon kuman na taghanap nan PNP an suspek sa hit and run labi na sa pag-trace sa tinuod na identidad sa driver na nagmaneho sa Isuzu SUV.
