Isa ka staff sang board member sa Provincial Capitol sang Negros Occidental ang ginakabig karon nga Patient Under Monitoring (PUM) bangud nga ini ang may travel history kag naglain ang iya pamatyag rason nga ini ang ginpalantaw sa ospital.
Suno kay Gov. Bong Lacson nga ang amo nga staff ang nakatambong sa ginpatigayon nga PCL Convention sa Manila sang nagligad nga semana kon diin nakatambong man didto ang isa ka konsehal sa Negros Oriental nga nag-positibo sa COVID-19.
Bangud sini ginpahamtang bilang PUM ang amo nga empleyado kag gilayon nga gin-refer sa government hospital sa Bacolod agud masunod ang ensakto nga protocol sa pag-address sini nga kaso.
Ginaklaro nga ang amo nga empleyado ang indi Patient Under Investigation (PUI) kundi Patient Under Monitoring lang.
Sa karon lubos na nga ginahimo sang provincial government sang Negros Occidental ang mga preventive measure sa atubang sang nagasaka nga kaso sang COVID 19 sa pungsod.
