Isa ka German National Nakit-ang Patay sa dihang nodunggo an tagsakyan na barko sa Bilang-Bilang Port sa Brgy. Taft, Surigao City. Tagkilaya an biktima na si Dirk Heinz Bell, 53 anyos, netibo na taga-St. Wendel, Saarland, Germany. Sa pamahayag ni Eliza Conte dela Torre, ija anak an 17 anyos na uyab sa German National. Matud pa, gikan Germany si Bell ug no-stop over ini sa Cebu kay didto nag-eskuwela an ija anak. Kagabii an nobiyahe an duha sakay nan barko sa Cokaliong Shipping para mouli ug magbakasyon sa Siargao. Kalit lamang na alas 2:00 sa kaadlawon samtang naglawig an barko, naglain an lawas sa German National, sige balik-balik sa CR hangtud na nagluja ini. An 17 anyos na uyab an noduol sa kadagkuan sa Cokaliong pero waya ini manumbaling hangtud na may pasahero na Nurse an notabang sa ila. Alegasyon pa na sa dihang nangajo nan tambay sa personahe sa barko, expired na an tambay. Nograbe an tagbati sa German National hangtud na nokumbulsiyon ug nakutluan sa kinabuhi. Sa pagkakuman, an patayng lawas ni Bell an tagdaya sa isa ka punerarya diri sa siyudad ug tagtakda ipailayom sa otopsiya. Nohimo na isab nan koordinasyon an PNP ngadto sa German Embassy may kalabutan sa nahitabo kan Bell.
